抽水呢家嘢，民建聯認第一，冇人敢認第二啦，佢哋前晚黨慶嘅「抽水」活動亦一浪接一浪，幾個獅子開大口拍賣環節後，2,020萬袋袋平安。
劉江華墨寶貴過饒宗頤
嚴選最物有所值環節，非曾鈺成同曾太伍嘉敏莫屬，一個唱《紅棉》，一個陪舞，單睇曾太拗晒腰挨落阿曾度，呢88萬算好抵嘞。
最令人譁然首選劉江華「上善」墨寶，以及李剛嗰支過氣奧運火炬，竟然各自獲城中「俊傑」以200萬競投；相反國學大師饒宗頤嘅福字墨寶卻只籌到130萬，係唔識貨抑或好識相？八方真係唔識咯，但肯定呢次拍賣，見盡人情冷暖。唐唐捐出嘅一支法國波爾多紅酒，只係籌到30萬咋，睇到唔少在場人士眼凸凸。