上海姑爺羅康瑞同導演王家衛應該心有靈犀，王家衛籌備咗十年、講詠春大師葉問嘅《一代宗師》終於決定下月上映，而羅康瑞有份粉墨登場嘅紀錄片《詠春》亦會喺呢個月播出，兩套片嘅trailer家同時喺YouTube有得睇，話唔係夾埋都冇人信！
羅康瑞係葉問徒孫
都話呢個月多事發生，羅康瑞認真忙，周四至周日剛晶大婚，羅太朱玲玲忙着娶新抱，羅康瑞旗下瑞安房地產（272）喺佛山嘅「嶺南天地」亦賣得如火如荼。佛山係詠春發源地，咁啱上海姑爺十幾歲開始學詠春，仲係葉問徒孫，即刻喺個盤度大玩詠春花臣。
佢除咗喺「嶺南天地」入面整咗個「詠春堂」，請來喺澳門教拳嘅師弟雷明輝坐鎮之外，仲花錢製作一套片長30分鐘嘅紀錄片《詠春》。
齋睇條預告片都相當有水準，拍得住海外製作，拍攝團隊應該唔簡單。上海姑爺除咗坐定定講詠春對佢嘅影響之外，仲露番兩手。點耍都好，喺朱玲玲眼裏面，上海姑爺一定有型過梁朝偉啦！
上海姑爺呢條詠春紀錄片full version早過《一代宗師》有得睇，本月21號喺佛山「嶺南天地」舉行首映禮，羅康端同雷明輝師傅都會出席，睇來呢兩個月都係葉問最強。
《詠春》trailer精選
李華華
mailto:[email protected]