喺上周六曼聯主場鬥阿仙奴嘅大戰，阿仙奴左閘安德里山度士半場同紅魔鬼前鋒尹佩斯換波衫呢單嘢餘波未了，繼球迷同領隊雲格表示不滿後，最新到安德里山度士親自道歉兼出嚟解畫，大叫無辜。佢話半場換波衫係佢老友尹佩斯提議，佢哋都估唔到呢件事引嚟咁大反響；如果佢估得到，就唔會公開喺鏡頭前換。另外，有外國球迷惡搞山度士食嘢嘅相，將尹佩斯件波衫key做枱布（圖），純粹笑吓。