馬鞍山同將軍澳兩幅地，喺政府推出「曾兩招」後截標，最快呢兩日知結果，唔知係咪見到過去個幾星期，樓市交投急煞車，加上發展商猛咁話呢兩招好辣，噚日市場無端端傳出，兩幅地可能流標，地產商要向政府施個下馬威咁話。
政府話冇嘢講
馬鞍山同將軍澳兩幅地上周五截標，反應唔算差，分別有九個同埋七個財團爭奪，每幅估值都有廿幾億。雖然地產建設商會執委會主席梁志堅喺政府出招當日，曾經發晦氣鬧爆政府想逼發展商唔投地，但照道理，如果發展商真係想示威，唔入標咪得囉，唔使搞一輪，搞到流標。
幾個有份入標嘅發展商，噚日都話收唔到風，政府就指未完成開標程序，冇嘢講。的確，政府出招後，成交少咗，但樓價跌唔落，地產商睇唔通後市，出價保守啲唔出奇，會唔會專登落政府面，就真係唔敢講喇。