財資市場公會（TMA）上周五喺君悅搞周年晚宴，筵開40席，金管局同賓架用音樂打成一片。據聞全晚高潮之一，係「金管局歌王」副總裁阮國恒，夥拍恒生銀行（011）執行董事馮孝忠，獻唱英國樂隊Bee Gees三首金曲《Staying Alive》、《First of May》同《How Deep Is Your Love》，仲有早排熱爆嘅《年少無知》，夠晒潮。
擅長玩低音結他同色士風嘅TMA理事會主席兼金管局副總裁彭醒棠，就跟金管局同按證公司組成樂隊，擔任伴奏。
阮國恒嘅歌王美譽，並唔係浪得虛名，聞說當晚佢以假聲演繹《Staying Alive》，唱功同Barry Gibb幾可亂真，博得全場掌聲。09年9月底，金管局前總裁任志剛卸任前夕，局中仝人喺馬會設宴餞別，亦係由阮國恒高歌張學友一曲《祝福》。