舊年底上市、今年中改名，前稱中國休閒食品嘅蠟筆小新食品（1262）又有新搞作，同「憤怒鳥」玩crossover。公司新近攞咗憤怒鳥中國版權，簽咗三年合約，可以用憤怒鳥個名同肖像喺內地賣糖果、啫喱，成為繼可口可樂之外，另一個可以用憤怒鳥賣飲食產品嘅品牌。
此小新不同彼小新
蠟筆小新加埋憤怒鳥，成件事好卡通，查實呢間蠟筆小新同日本漫畫嗰個奀皮細路野原新之助完全冇關，只係中文名相同，英文直讀普通話拼音Labixiaoxin，唔係Crayon Shin chan，所以產品包裝冇小新小白㗎。
蠟筆小新推出「憤怒鳥軟糖」，執董鄭育煥噚日話，產品推出兩個月幾乎賣斷市，佢冇講具體賣幾多，只係話佔9月份糖果業務營業額10%，憤怒鳥變成開心鳥！可惜蠟筆小新買嘅版權唔包香港，憤怒鳥軟糖暫時香港冇得賣。