八十年代嘅Good Old Days，那個年頭沒有模，不過曾有一顆星閃過：「星空裏萬物在轉，歷億萬年」 《我係小忌廉》絕對係魔法動畫中嘅經典，自1983年首次在香港播放，雖然間中都有重播，但佢嘅產品都屬稀有物；估唔到29年後在MegaBox的日和號，給我再遇上「這張可愛歡笑臉」。
記者：朱崇德 攝影：蔡家輝
攞正牌×小忌廉
時裝潮流品牌玩Crossover，衫褲鞋襪交叉叮噹、One-piece等都見過，感覺有點麻木！但食店加入動漫元素，感覺較新鮮，而且仲係八十年代嘅經典──小忌廉，上周六Grand Opening，仲請嚟原著漫畫作者高田明美老師撐場！
問餐廳負責人Androw：「日和號×Creamy Mami係香港首間Crossover主題餐廳，今次以小忌廉做主題，會由即日至明年二月一號。」之後會點？預計每年會有四至五次轉換主題，交叉內容非常廣泛，包括電影、音樂、動畫、藝人等，每次為期四至十二個星期不等，每次都有唔同佈置、食品同紀念品，聽聞，現在好似與日本組合Luna Sea磋商之中，成唔成事？呢個問題暫時仍然太早！
高田老師 獨愛粉紅忌廉
為切合餐廳主題，特別精選了四樣甜品作小忌廉Dessert Menu！當中最貼題的，一定是香蕉及雜果做成的Pancake，須知小桃的父母是經營這門生意！「高田老師一直有參與食品製作，就細如Pancake所用的忌廉，為咗貼合漫畫的夢幻感覺，都要由普通的白忌廉改為粉紅色的士多啤梨忌廉！」其實所有甜品的朱古力牌，及Special Coffee杯面的小桃公仔，都係高田老師為了餐廳特意繪畫的新手稿，再製作成食物模具！「好似Cake of the Day的藍莓芝士蛋糕，就是為了呼應小忌廉的一頭紫色秀髮；Starry Grape Soda這款巨峰提子特飲，除了色調紫紫哋，仲有成星星狀的蒟蒻顆粒，簡直有如小忌廉手上的星星環！」至於味道方面，以同類主題餐食嚟講，感覺還蠻不錯，當中還感受到一番誠意！
戳印仔 換紀念品
這裏的小忌廉精品是另一焦點，所有產品為新店開張而度身訂做，連日本都買唔到！現知的紀念品有貼紙、心口針、環保袋、文件套等，並以「用餐戳印仔，再以加錢換購」，不過所有精品數量有限，換完即止，所以經常巡舖會係相當重要！
首度曝光 CG小忌廉MV
開幕當日的焦點，一定係高田老師進場後，即席畫出小忌廉手稿！若真係Fans，應該會發現小忌廉個頭明顯細咗，面相亦Young咗；小桃造型無乜改變，但感覺天真爛漫咗。唔通高田老師畫風變咗？忽然會場一黑，播出一段以全CG製作的《小桃×小忌廉》MV，細看畫風，上色有點中國水墨畫的漸化筆觸！在記者追問下，高田老師表示明年是小忌廉的30周年，可能會有進一步動作，詳細內容將容後公佈，明年的小忌廉會否翻叮？真係要大家拭目以待。
日式料理 Fusion變奏
日和號其實係日式料理店，基本壽司、拉麪、烏冬、串燒等食品都完全到位，當中推介佢哋個火炙他他牛肉沙律！牛肉略燒至一成熟，配上酸酸甜甜的他他汁，感覺很Fresh，不過畫龍點睛處係佢放面的葱粒及蟹子，吃下來更感鮮美；飽肚的有石鍋泡菜餃子烏冬，石鍋餃子烏冬原本是平常不過的日式麪食，不過加入泡菜後變奏成Fusion菜，在烏冬之中，夾雜着泡菜的微酸香辣口感，我覺得比大家平常用開的七味粉，來得更惹味得多！
日和號壽司料理（2359 0025）
地址：九龍灣宏照道MegaBox L1005