左丁山不常買賣樓宇，上一次賣樓，因自己太忙，冇時間與經紀接洽，全由老婆代辦，手續前後搞咗個幾月，未見過買家，亦不知佢姓名，只係老婆叫簽名就簽名，就完成整單交易。好彩左丁山不是高官，不是議員，否則有人問起，自己會答：「全部係老婆搞嘅噃，自己唔知詳情。」跟住就會俾強悍到極女議員葉劉淑儀與傳媒嘲諷：「躲在女人身後的男人，搵老婆做『擋箭牌！』」
點解傳媒（有好多女記者）不相信老婆能頂半邊天呢？不尋常，總之係陰謀論治港，難以理喻，當香港特首話：「林奮強唔知」，管財稅嘅財政司長曾俊華講：「所有非官守議員都唔知」，行政會議召集人林煥光話：「林奮強唔知」，三大治港人物講嘅說話都遭受強烈質疑，香港已進入誰也不信誰，冇一個人，冇一個機構有公信力時代，大家任由陰謀論，懷疑論滿天飛，講理性討論已是多餘，以後進入純粹角力階段，唔怪得有人緬懷殖民地時代，昔年尤德講完，夏鼎基講完，鄧蓮如講完，試問有邊一位立法局議員，邊一張報紙夠膽質問完又質詢？嗰陣時幾「安定」呀！
左丁山做trainee時嘅師傅級前輩L每年呢個時候必定自加拿大回港一行，佢年已八十幾歲，猶自健步如飛，聲若洪鐘，見到佢就記起當年佢睇起一位MBA trainee，晚晚帶佢出去見客應酬，出入杜老誌道最出名嘅舞廳飲XO、十二年威士忌，跳part舞不在話下。當其他人羨慕呢位同事之餘，P竟然遞辭職信，令大家震驚，逼P講出真正理由，原來P太係會計師，不滿意P晚晚在外應酬，下哀的美敦書：「我晚晚在家抱女湊女，你亦晚晚在舞廳抱女攬女，不如離婚！」P唯有立即請辭，走咗去教書，晚晚準時返家陪老婆。畢竟我地嗰代與前輩嗰代完全唔同，今天70後，80後一代又與左丁山一代不同，老婆在家有極大影響力，一對夫婦同是學歷相同，職業資歷相等嘅話（好多中產家庭往往係咁），試問老婆有何理由要躲在老公後面或老公躲在老婆後面？大家咁高咁大，總之邊個有較空閒時間就負責處理家庭大事（如買樓，投資）啦。今天連葉劉淑儀都嘲笑林奮強，躲在老婆身後，佢不妨自問，佢是否一位男人見到都怕怕地嘅悍將？今時今日，不知真相就嘲笑男人躲在女人身後有兩個意涵，一是女人自慚不如老公，樣樣靠慣男人，或是男人知道自己老婆無辦事能力，唔信人地老婆幾打得。