周一建議港股投資者由進取變番觀望，恒指就連續兩日回吐，但似乎出現炒股唔炒市嘅情況，個別二三線股仍然有得升，算係出現較樂觀嘅劇本。不過，晉佳預計即使港股短線未見頂，亦會係升浪尾聲，不宜過份心雄，現階段可以用限制注碼形式，大約用之前進取時期嘅一半資金，精選買入落後二三線股。
個別跟隨經濟周期起落嘅股份，最強嗰批早已爆上。化工股當中，建滔化工（148）定單數字往往較同業更早反映經濟復蘇，股價一早已經開車。紙業股亦係經濟溫度計，玖龍紙業（2689）面對需求回穩，加上資本開支已見頂、行業供應增長放緩，令到產品有加價能力，股價亦已爆上。
上述兩隻股升咗咁多，炒復蘇可能要去到質素較次嗰批股份，理應喺港股中線升浪尾聲，有條件升番轉，包括儀征化纖（1033）。
現價買 目標2.1元
主要生產成衣用料聚酯產品同聚酯原材料PTA嘅儀征，第3季虧損7356萬元人民幣，主要因為聚酯價格同棉花價齊上齊落，棉花價格低沉，儀征自然難賺錢。PTA價格近期徘徊每噸7000至8000元人民幣，係近3年低位，要儀征股價大升，首先要PTA價格升番去1萬元樓上至得。從基本因素出發，要經濟復蘇令到佢業績轉盈，仲要變成大賺，的確未係時候，所以股價9月至今都喺低位浮浮沉沉。
雖然儀征近年基本因素轉弱，但爛船總有三斤釘，佢市賬率得0.6倍，估值相當低殘，點都有啲吸引力，所以過去一年，每逢港股升得興起，Party去到差唔多最後，仍會輪得到儀征發威，至於佢大成交急升嘅時候，就係港股升浪接近終結之時。
儀征5月至今醞釀頭肩底形態，頸線喺1.85元左右，10月開始成交轉趨活躍，似乎就嚟要炒一轉。由於儀征有炒落後嘅特性，家睇怕係港股升浪尾聲，相信係時候跟進，現價買入可博升至2.10元，明顯跌穿1.60元就止蝕。
晉佳
本欄逢周一、三及五刊出