【記者林賽香報道】倫敦殘疾人士奧運會曲終人散，港隊凱旋而歸之際，負責推廣殘疾人士運動及派隊的香港殘疾人奧委會（簡稱：殘奧會），悄悄進行「殘酷一叮」，逾廿年歷史、三年前在國際賽奪兩金三銀的輪椅網球隊，將於明年3月率先解散。網球員內心一團火未熄，堅持練習到最後一刻，扛起薪傳、捍衞殘疾人運動多元化的使命。
器材訂場皆成問題
加入輪椅網球隊六年的阿聯表示，今年初有殘奧會執委成員放風，指輪椅網球成績欠佳，明年停止撥款，終止相關訓練及推廣，「我哋一直想同殘奧會嘅人開會了解，但冇回覆」。阿聯表示，其實四年前起，殘奧會已大幅削減投放在網球的資源，「冇供應比賽用嘅輪椅、少咗幫我哋報名參加大賽、前教練唔做後冇積極搵教練，搞到幾年都冇教練」。
他表示，一般的網球教練已能執教，但網球教練在香港渴市，加上殘奧會只以義務性質請教練，更難請人。「我哋唔識點練習，唔知點樣爭取參賽經驗，成績自然下滑，殘奧會就有藉口殺波」，今年8月舉行的倫敦賽事，香港輪椅網球隊也無緣參與。
面對無情殺波，全體廿多名球員熱血不減，每逢周四、六，風雨不改到沙田網球場練習，「我哋唔會畀個波停！」
球員團結一致，首要解決輪椅老化問題，阿聯說：「打波輪椅嘅轆斜啲，減低同地面嘅接觸點，行嘅速度快啲，靈活啲；仲加多個後轆，防止翻車。」一部全新打波輪椅動輒五萬元，經濟封鎖後，阿聯日以繼夜上網搜羅製作方法，經大半年鑽研將一部普通輪椅改裝為打波輪椅，改裝費2,000元。
一旦被殘奧會踢走，訂場必有困難。他們構思自組輪椅網球會，發現康文署場地爭崩頭，「我哋要揀冇障礙設施好，又有士多房放打波輪椅嘅場，得沙田三個場啱，但好多人爭，人哋有人力物力，我哋細會點爭？」
早被列入觀察名單
殘奧會總幹事林俊英表示，幾年前將網球、游泳及籃球列入「觀察名單」，明年先停止資助網球，游泳及籃球或會是下個目標。他解釋，該會每年總經費1,800萬至2,000萬元，負責13個運動，要有效運用資源，須集中發展有潛質項目，「睇吓啲項目攞牌機會幾多？場地夠唔夠？運動員人數同教練質素，決定做唔做落去」。該會屬非政府組織，本年度獲康文署撥款635萬元，佔總經費三成多，其餘來自捐獻。康文署表示，項目的發展策略由會方自行訂立，尊重殺波決定。