新聞不時報道兄弟不和、家族爭產案，都皆因一個錢字。肥肉在前，親兄弟都無情講，連一直拍住上的韓國現代及起亞最近也出現內鬥，本是同根生的SUV KIA Sorento最後也要上場對決現代Santa Fe。Sorento率先以29萬車價登場，有齊七座天窗19吋軨，仲識自動泊車，花臣方面先贏一仗。
記者：李鑒泉 攝影：譚盈傑
模特兒：Paris@Pure Models
外形粗獷 內櫳享受
講起亞同現代之間的關係，真係一疋布咁長。簡單講就是：現代於98年收購起亞後，起亞變成現代的副牌，車價較相宜，形象也多變。即使是09年推出第二代Sorento也跟第一代完全兩個樣。為保持新鮮感及吸新客，廠方今次為第二代進行小改款，儘管4,685×1,885×1,700mm尺寸較Audi Q7為細，但粗獷的方形線條及外露輪拱令人有大碼SUV的錯覺，除泵把外，車頭兩側長形霧燈融入鬼面罩造型之中，HID頭燈連燈眉、一體化LED尾燈組及電摺鏡，能讓人一眼將新車辨別出來。代理也直接將新車升級至19吋輪圈，買家又可慳幾千。內櫳方面，巨型天窗令車廂感覺極開揚，前座兩張皮椅除可電動調校，更有冷熱各三段的通風系統，炎夏凉浸浸，寒冬暖笠笠。中控台以實用為主，除能播USB、iPod音樂外，中央顯示屏更能作後泊鏡顯示。而且，以上所講全屬標準裝備，唔使另外加錢。
馬力升級 頭驅更慳家
通常小改款型號引擎都是新瓶舊酒，但今次Sorento的2.4公升GDI引擎不只將馬力提高18匹至192匹，扭力也增至24.7kg-m，配合六速自動波波箱，表現線性，畢竟噸位十足，總不能強求有彈射而出的表現。駕駛途中代理指懸掛經重新調校，實試後差別不太大，可能是19吋輪圈的關係，至少中後排乘客都不致有投訴。新車設有頭驅及四驅版，若不是要行崎嶇山路的話，可選車價平一萬的頭驅版。
不是說韓氏內鬥嗎？是的，只因全新Santa Fe也是用上同一引擎波箱，分別在外殼內櫳設計，價錢也有差距，要豪華定要經濟？真係要試勻兩部先知！
親試自動泊S位
Sorento配置自動泊車系統，只要按下波棍旁的按鈕，車身雷達自動會掃描適合車位，而錶板的TFT屏幕會提示入D波還是後波，駕駛者只需看着屏幕的後泊畫面及控制煞車掣，即能輕鬆泊好S位。小記親身測試，系統泊車位置準確，惟要膽大心細，不然電腦會不斷計算泊車角度，隨時慢過自己泊。
KIA Sorento
引擎：2,359cc直四GDI
馬力：192PS/6,300rpm
扭力：24.7kg-m/4,250rpm
傳動：六速自動波+/-，前輪驅動
售價：$289,000起
查詢：2760 9933（KIA Motors）
唔追款再平啲！
買得韓國車無非貪佢抵食夾大件，就算係facelifted後的Sorento價錢仍然相宜。如果仲係因車價十五十六，不如考慮小改款前的Sorento，除了霧燈、泵把造型不同，外觀仍然醒目，內櫳舒適度也相當接近，而引擎輸出就輕微減少至174匹，但車價只係$268,000，對實用型買家更具吸引力。據知數量有限，賣完就無。
