黃國柱，25歲，首屆「香港盃國際詠春大賽」參賽健兒，雖然失明，卻被挑選與數以百計來自世界各地的詠春好手同場較量。他中學時是體育健將、短跑校隊，中三時與大兩歲的姐姐，同被證實患有無法根治的黃斑點病變眼疾，曾自暴自棄，自此與運動絕緣。十年下來，一對眼睛衰退至只剩兩成視力，剛報讀盲人輔導會復康班，學習點字、摸黑煮食。面對未來黑暗日子，自信馬步穩了，有力揮出第一拳，已無所懼。記者：呂麗嬋
「我有三兄弟姐妹，對上有兩個家姐。二家姐中三時睇嘢變形，醫生話佢有黃斑點病變，屬先天隱性失明患者，係遺傳，我同大家姐先後去驗眼，結果大家姐視力正常，我就出咗事。醫生話冇藥食，做手術未必有幫助，視力會一路衰退。嗰時我只有14歲！唔想諗，前路茫茫，惟有日日打機麻醉自己。
曾因自卑拒絕運動
爸媽都係工人，讀書唔多，冇諗過點醫，遲早盲，惟有喺度等。有時二家姐會同我呻：細佬呀，你對眼又差咗，問我你睇唔睇到呢樣、睇唔睇到嗰樣。佢一講我就行開，講出嚟有乜?用？改變唔到事實。打後嗰幾年，喺學校睇唔到扮睇到，好自卑，怕俾人知，覺得你唔掂。
初中時，我係田徑校隊，鍾意打羽毛球，自從對眼有事就冇再打。體育科由年年考A，跌到只有C。會考勉強有十分，酌情原校升中六，但嗰時我隻右眼已經睇唔到，只靠左眼，仲要報紙頭條咁大隻字先睇到。拖拖拉拉讀埋IVE，我知冇辦法唔面對現實。上年，我去咗盲人輔導會參加復康課程，喺中心推薦下，糊裏糊塗就參加咗詠春班。
我記得上第一堂，師傅就鼓勵我哋，佢話詠春對打，要搵對方破綻，好多時靠肢體感覺，我哋睇唔到，正係最好嘅訓練！佢教我哋先做好防守，用意識去感受對方動作，然後先考慮點樣出擊。我係武俠片迷，喺漆黑中憑感覺捉套路唔易，但呢種武術境界令我好嚮往。
馬步穩協調能力增
所以，每次師傅手拖手教完我哋，我就會搬開晒屋企啲嘢，搏命練習。憑記憶記住每個步法，人哋練一個鐘，我就練兩個鐘。大半年落?，我感覺到自己馬步穩咗，反應同協調能力都有進步，仲搵番運動後流汗嘅感覺，恍如隔世。」
師承葉準徒弟
黃國柱師承香港詠春聯會副主席游偉強，游師傅年輕時向葉問之子葉準拜師，在香港盲人輔導會義務任教多年。游師傅說，聯會2009年成立時已提出「視障詠春」，一班有心的師傅專程學習針對視障人士學習詠春的方法，手把手教授。首屆「香港盃國際詠春大賽」分為黐手賽及全接接觸對抗賽，特設的視障組別，則主要是套路賽，暫不設對打環節，希望外界對視障詠春加深認識。