馬賽早前去美國觀賞被列入世界自然遺產的科羅拉多大峽谷（Grand Canyon），雄偉壯觀的懸崖峭壁，讓她眼界大開。馬賽原本想在此地跳起拍照，但看到身旁的遊客差點跣腳滑倒，嚇到馬賽面青腳震，最後只敢乖乖企定影相。撰文：嵐山
馬賽上月趁放假，到美國參加朋友的畢業禮，並順道到三藩市、拉斯維加斯和洛杉磯吃喝玩樂12天。由於是自駕遊，馬賽沿途可以欣賞好多美景，她說：「我影咗好多靚相，其中一張係由三藩市揸車去洛杉磯時影，咁啱係傍晚六點幾嘅magic hour，真係可遇不可求，我哋忍唔住停落嚟欣賞。」
坐直升機欣賞
不過，令馬賽最難忘的，還是到科羅拉多大峽谷，站在懸崖之上，馬賽坦言有點腳震震，她說：「原本想跳起影相，但見旁邊位女士差啲跣腳，而且邊位冇欄杆好危險，我只敢企定定影相。」馬賽還有機會坐直升機遠距離觀賞這個自然奇觀，她說：「個大峽谷真係好壯觀，聽講係世界七大自然奇觀之一，一生人點都要去睇一次。」
馬賽還有到過星光大道、環球片場等旅遊景點參觀，但能與當地人交談，反而令馬賽體會更深，她解釋：「有次同一位由紐約城市去咗沙漠作街頭表演嘅人傾偈，原來佢係一位退休警察，雖然當地又熱又曬，但佢依然好落力唱歌，佢嘅敬業精神值得我哋學習。」
去邊度：美國
玩幾耐：12日
