國米上周作客3:1反勝祖雲達斯，教頭史查馬斯安尼卻嬲爆怒打後備席，仲搞到入院照X光！何解咁躁？原來祖記領先那球越位在先，仲有列治史迪拿粗野攔截又冇攞第2張黃牌，搞到史帥在這場成名戰幾乎斷手。
亂世出英雄，若非上季國米亂糟糟，炒掉兩位教練仍無人接手，史達馬斯安尼都未必有機由青年軍教頭臨危受命。史帥上任前，曾幫國米贏過有「青年歐聯」之稱的NextGen Series冠軍；上季尾走馬上任，還一度將國米帶回爭標之列。
史帥今季首度孭飛，但就被祖記總經理馬路達揶揄他排陣亂點鴛鴦。的確，開季僅兩個月，他用過的陣式包括4-3-1-2、4-4-2及3-5-2等。上仗贏祖記更大膽起用3-4-3與之對攻，國米最終創下9連勝，證明說他亂點鴛鴦的，才是亂噏廿四。
3後衞陣式用得其法
說到3後衞陣式，上季加斯柏連尼便用此陣令國米後防崩潰，最終被炒，點解史帥無事？其實3後衞極依賴3人速度和體力彌補二閘空位，加帥用了森美爾、盧斯奧和辛尼迪3大長老，結果整死自己；史帥則以年輕活力的蘭奴捷亞和祖安古靴美支援森美爾，即高下立見。當然，史帥要證真材實料，非要贏個獎盃不可，明晚出擊的歐霸盃如何？
文：方柏翹
now足球評述員