本周中美齊齊換屆，恒指連日衝高後，回一回氣都好正常。不過，個股依然好有鑊氣，從保利協鑫（3800）及富士康（2038）打入十大成交榜可見一斑。其實成交異動其實仲有中國全通（633），繼上周五有81球交叉盤後，噚日再有24球交叉盤，作價同樣係1.60元。Check番SDI，除咗大股東外，揸最多貨嘅係劉央，大膽假設真係佢出貨，就可以消除龐大沽壓（皆因劉央高位買咗唔少）。
全通曾為中期業績發盈警，結果少賺近五成，呢個反而係炒見底嘅最重要元素。集團持有淨現金（計埋定存）12億銀，相當於市值超過六成，含金量極高，加上派息穩定，現價年度化息率都有近3厘，防守力一流。
全通噚日逆市抽高4.6%，收報1.59元，企穩牛熊線之餘，10日線亦快升破牛熊線，形成黃金交叉，利好後市，喺資金氾濫下，短炒博見1.80元應冇難度，潛在升幅13%，惟跌穿1.50元要嚴守止蝕。
唐牛