非常相熟嘅老同學財務顧問Ｗ相約在星巴克飲茶，左丁山上到去豐盛創建大廈一樓，已俾佢嗌埋去座位，原來佢一早到咗搵到位，跟住半開玩笑咁講：「呢位係我屋企黃面婆！」老婆就老婆啦，乜黃面婆啫，好彩係老夫老妻，佢老婆笑住同左丁山握手，相信依家啲三十零歲嘅新款師奶一定唔鍾意老公向外人介紹呢位係我嘅黃面婆！
貿易Ｐ仲傳統，每次在馬場見到佢與太太，佢梗係話：「賤內……」新派人/馬主Ｃ在旁不明其意，Ｐ太應慣咗，冇乜所謂，Ｃ太就背住面嘴藐藐。左丁山靜靜雞對貿易Ｐ講：「唉吔，廿一世紀嘞，最多講拙荊算嘞，唔好講賤內。」
黃面婆，賤內，拙荊也者，係古老名詞，現代女士未必肯接受，但好似大陸咁講「愛人」，肉麻到痹，不如都係簡簡單單講太太，老婆算嘞。中國古代以男人為中心，一啲用詞到今天會俾人話政治不正確，麻煩友隨時告到上平機會㖭，例如「婦人之仁」（宋襄公）就有貶意，葉劉淑儀之類點會接受。「婦孺之見」？陳惜姿會唔肯過你！香港今天女權當道，立法會內有劉慧卿，毛孟靜，陳婉嫻，葉劉淑儀，梁美芬，蔣麗芸呢啲咁強悍嘅女士，政府有一位一個人打晒全場嘅林鄭月娥，行政會議內有一位專門撲火嘅胡紅玉，銀行界兩大銀行有李慧敏（恒生）、馮婉眉（滙豐）……例子數不勝數，仲有好多站在背後不出前台嘅家內女強人呢！
故此聽到網上指男人躲在女人背後，葉劉淑儀公開叫林奮強不要搵埋太太出嚟，以前傳媒又鬧唐英年、梁振英、陳茂波搵老婆擋箭，非男人所為，左丁山覺得好奇怪啫，唐太係宋美齡校友/師妹，著名女子大學出身，學識甚高，梁太係律師，陳太與陳茂波係中大同院系同學，林太係會計師，有邊方面唔可以代老公做事（至於做乜事就係另一回事）呀？話佢地冇用呀？話佢地俾老公利用呀？簡直係侮辱佢地，譬如林超榮講：「我老婆做嘅，唔關我事。」唔通我地要懷疑林太屈穎妍無此能力，只識煮飯？依家人人都識陳惜姿，佢老公曝過光未？唔通我地會話佢老公躲在陳惜姿背後？講呢啲說話，根本就係侮辱女性！