歐聯打到第4輪，對賽球隊熟口熟面，加上今屆第1次初嘗3點9睇波滋味，好多球迷或會早搵周公好過；但其實今輪屬投注良機，先選迎阿積士打復仇戰嘅曼城。曼城目前係分組賽包尾，今場將面對今季開咧以嚟最重要嘅一役；除非佢哋唔志在，只望喺國內再稱霸。主W得1.34倍可做熱膽，喺本欄當然會冒進，取[-1]及大勝波膽。曼城上仗作客鬥韋斯咸上半場對家入波先被慘判越位，前者避過一劫屬好運；其實佢哋喺下半場已搶回主動，但可能後顧大戰，未算有必勝嘅決心。取分人物泰仔冇踢足，阿古路後備踢了20分鐘，高拉洛夫同薩巴列達齋坐，一切可能為今場而戰。曼城踢歐聯口碑不佳，但主場連上季其實錄得2勝2和，未算太差。對手阿積士賽績屬門口狗；嚴格嚟講，走得太多好球員，喺國內未也未足以呼風喚雨，上仗陣容頗完整兼主場竟負維迪斯，未必單純留力解到畫；曼城後防傷兵多非穩，阿積士要入球不難，但入球「大」得1.5倍，乏味。英冠，亦取唔贏唔得嘅白禮頓，主場大炒實力只屬英甲頂、英冠尾嘅彼德堡；白軍已7不勝，上仗僅和列斯聯只因射手馬卡爾史密夫末段12碼宴客，打快車續主場出戰，不炒弱旅反底待何時？(下次見報日期：10 /11)蘋果波神
今周精選
《正》曼城勝[-1]《副》白禮頓勝[-1]《冷》曼城勝3:1,4:2