【牛腩篇】咖喱牛腩，有辣有唔辣。牽牛同咖喱將總結每周球賽，見到抵讚嘅事，牽牛定必重重有賞，用幾百字大讚吓佢；但見到抵鬧嘅人，咖喱就會毫不留情，省佢一餐。
曾主管港澳事務嘅前九品芝麻官，近期走出嚟批評香港嘅港獨分子，叫佢哋咁唔鍾意香港就放棄中國籍，放棄香港居留權。不過此話一出，即時俾人踢爆佢兩位孫女都喺美國出生，不單肯定有美國國籍，連帶佢女兒都好大機會有美國籍。共官一向言行不一，不過今次真係要讚吓呢位白頭老官，或者遲啲喺紐約、洛杉磯會見到呢位老人家。講開國籍，巴塞隆拿嘅美斯就剛剛添丁，並起名叫堤亞高㖭。原本美斯同佢女友安東蓮娜都係阿根廷人，但堤亞高喺西班牙出生，雖然言之過早，不過至少佢未來代表阿根廷定西班牙踢國際賽，肯定仲有排講。名門之後其實都好多人關注㗎，好似施丹大公子同二公子，據聞球技都好好，家係皇家馬德里青年軍嘅重點培訓新星；施丹囝囝一樣可以代表法國或者西班牙，大仔安素仲已經代表過西班牙小國腳㖭。美斯添丁事件中，都不得不讚吓巴塞教練維蘭路華。事關美斯上周五剛做老竇，希望喺上周六對切爾達嘅西甲聯賽免役，可以專心陪家人；不過維蘭路華就天王都冇面畀，講明冇球員可以用生仔做唔上陣嘅藉口。美斯死死地氣要上陣，心繫家人之下，全場都患得患失，空門又失機，扭過人又唔見；但維蘭路華一樣要佢打足全場。講真，維蘭路華今季先至坐正，要鎮得住呢班幾乎贏晒所有盃嘅球星，紀律一定唔可以鬆，特別唔可以大細超；事關碧基、丹尼爾呢啲，紀律都唔係好，如果維蘭路華一鬆畀美斯，肯定成為佢哋作反嘅理由。