收藏達人二號：陳烘
於香港甚至大陸，提起收藏相機達人應該無人不識陳烘。他六十年代開始當相機學徒接觸相機，1972年開設陳烘相機公司至今，收藏相機多不勝數，去佢舖頭恍如去咗相機博物館一樣，唔買都要睇吓。
師傅教路 好嘢無回頭
講到喺香港收藏相機，又點可以唔請教神級前輩陳烘先生！儲機多到自己都數唔晒嘅佢，開始儲相機原來係受師傅啟發，佢口中嘅師傅分別係人稱三叔的唐秋林先生及李祖斌先生，「當年我狂賣靚機俾日本仔，唔識自己Keep，到師傅提點，我先開始收藏一啲靚機。」
師傅們亦教佢分辨靚機，令佢獲益良多。陳生仲話儲機最好要全情投入，見到心儀好機，能力範圍支持到，一定要買，因錢可以搵過，好機就好有機會一去不回，所以有很多相機已忘記購買價呢！
有去過陳烘先生舖頭就會知道，舖內飾櫃中所擺放的唔少相機其實都屬非賣品，「大部份收藏品我都唔會賣，就算幾值錢都好，擁有部機比賣個高價更有滿足感。」陳生直認呢啲就係真正收藏家「我有人無」嘅虛榮心態，絕對唔係錢可以買到。「試過有客睇完部機好想買，好彩我一早貼咗『非賣品』，俾佢睇純粹為求分享兼Show Off，佢想發難都唔得。」陳生笑說。
相機中的勞斯萊斯ALPA
都話陳生收藏超多，要佢揀件最愛真係唔容易，但隨手一部卻可以講番段古你聽。好似呢部金色ALPA，罕有就不在話下，更係得來不易，「當年係一個日本人攞呢部機嚟俾我修理，但ALPA機好複雜，我都要請師傅出山幫手先搞得掂。」師傅一睇就知呢部機絕非等閒之輩，叫陳生試吓買咗佢。起初日本人都唔肯，後來部機完成修理送交俾佢，佢突然覺得難得有人欣賞，才肯賣俾陳生，成為佢手中又一部非賣品。
ALPA呢個牌子咁巴閉，連陳生師傅都話要儲，事關佢係瑞士的國寶級經典品牌，當中9、10、11及之前的型號全部以人手製作，產量極少。而葉Sir亦稱佢為相機中的勞斯萊斯，加上機身設計特別，造工精細，而佢嘅鏡頭則全部由其他名廠製作，質量極高，所以無論相機定鏡頭都絕對值得收藏。
珍藏品一覽
Koda Pupille
超小型127菲林小相機，於1931至1935年生產，被譽為最Pro的127相機，原屬德國製造，但這部屬後期的Kodak版，雖然外表有啲殘舊，但快門仲Work！
Goerz Minicord
於1953年德國製造的16米厘相機，保存極好，陳生特別愛佢的皮革部份，非常有型。
FOCA
歐洲除了德國造機出名，法國亦唔差，FOCA就係當中的著名品牌，以為機身設計普通，但原來景深設計相當特別，係陳生的收藏原因之一。
Yashica Atoron
於1965年製造，比16米厘更細的8米厘相機，甚有多年前的占士邦感覺。
黑Canon7貴百倍
訪問其間，一位二十歲出頭的年輕人Johnson突然現身在陳生舖頭，一方面想與陳生分享新買靚鏡，一方面原來係嚟「求賣」。「呢部Canon7黑版連F0.95光圈鏡頭，我搵咗好耐都搵唔到陳生呢部咁新咁靚，求咗佢好耐都唔肯賣俾我。」據Johnson講Canon7普通銀機只值五至六百元，但靚黑機隨時可上到四至五萬元，但佢入手過兩部都只係翻新貨，價值差得遠。「揀機好講經驗，有個好師傅教當然好，否則就要交啲學費。我呢部Canon7黑版自己都係得一部，你出幾錢都唔賣喇！」陳生邊教邊Show Off，收藏相機的樂趣完全無年紀界限。
15萬「放射」福倫達
另一朋友張志君先生，在陳烘先生面前謙稱自己係後輩，其實他有30多年玩機經驗，只收藏20多部機，但他有部鬼罕級相機Voigtlander Bessa II APO-Lanthar。部機矜貴在於鏡頭以含放射性物質的玻璃打造，家無可能再出現，當年產量極少，質素超頂級，顏色準確鮮明。十多年前張生以萬多元買入，最近知道另一部同款機以15萬成交！
儲機秘訣 得閒要郁吓
好多人儲相機以為放喺防潮箱就無甩拖，其實只啱咗一半。幾位前輩不約而同話最重要係不時同相機「做運動」，得閒用佢哋影相或按快門，好讓零件保持活動能力，機件中的油亦唔會咁易乾結，壽命自然更長。
鏡頭升值勁過樓
雖然儲相機具歷史意義，但如果你唔係咁有Heart，純粹想收藏博升值，儲鏡頭就絕對化算得多。事關一眾無反相機盛行，令差不多全線舊鏡復活重生，特別係一眾電影鏡如Cooke、Angenieux、Som等。二手相機店負責人Billy話：「以前無機用，支鏡幾靚都無用，只值幾百蚊，家可以用得番，好多鏡升值到過萬元。」計落升得仲勁過樓價。陳烘先生更話家Full Film越出越平民，舊鏡用途更大，預料鏡價仲未見頂，想賺錢的話，不妨儲多兩支靚鏡。
