民建聯原本聲大大話要喺長者生活津貼投棄權票，但上周一即第N次轉軚保皇，呢種禮義廉風格，20年來一路始終如一。社民連同一班後生仔就走上民記總部踢館，為佢哋20周年黨慶贈㷫。點知禮義廉擺下空城計迎示威。
社民連、左翼21、大專行動組等約十個年輕人，噚日由炮台山港鐵站遊行到禮義廉總部，希望禮義廉企硬幫長者，唔好淨喺識得保皇；社民連黃浩銘話，年輕人孝順兼敬老，點都會企喺長者嗰邊：「全城青年撐退保，保障老豆同老母，養埋譚耀宗老母！」
與狼英合唱《友誼之光》
禮義廉公關大員喺樓下已擋駕，話譚耀宗同葉國謙唔喺度，示威人士問「咁劉江華呢？」公關人員即刻被嚇窒，吞吞吐吐話劉江華都唔喺度，示威人士話佢眼神閃縮講大話，堅持要上去總部踢館。但上到去佢哋只見民建聯職員，惟有放低粒長生不老嘅「仙丹」同諷刺佢哋轉軚嘅軚盤就走人。
民記總部真空，其實佢哋去咗酒店搞籌款晚宴，現身晚會嘅劉江華冇穿冇爛，但就唔肯講政府有冇向佢招手。至於中英文奇差嘅Tree根同聲大夾惡嘅蔣麗芸表現成點，劉江華只係話兩人踴躍發言，需時熟習立法會工作。狼英、司局長都畀面出席晚宴，狼英仲同禮義廉合唱《友誼之光》。晚宴希望籌1,500萬，點知譚耀宗一幅簡單不過嘅「福」字畫，竟然籌得100萬；劉江華一幅極為普通嘅「上善」字畫，玩具大王蔡志明竟然以200萬投得，最後籌到1,900萬，世事真係無奇不有……
mailto:[email protected]
