今時今日，所有本港大地產商都喺北京有投資，但北京都有繼續來港招商，「北京．香港經濟合作研討洽談會」搞到第16屆，噚日出席開幕儀式嘅大孖沙只得九倉（004）主席吳光正，同埋就快娶新抱嘅霍震霆。
港商喺北京嘅累計投資金額超過1800億港元，講得出嘅地產商已經喺北京有項目，北京今次來港招商，好多大孖沙都交畀第二代或者左右手處理，好似恒地（012）派李兆基大仔李家傑，長實（001）就由副董事總經理甘慶霖出面。
往年新世界發展（017）創辦人鄭裕彤親身到場，同內地省市領導打招呼，家陣佢老人家抱恙，自然冇影。
查實吳光正同霍震霆親身撐場唔出奇，後者係愛國人士，而九倉近年先後入股遠洋地產（3377）、綠城（3900），吳光正私人入股龍湖地產（960），咁就知佢有幾積極拓展內地地產生意，梗係要主動搞好關係啦。