今個星期大家都選擇靠邊站，先離場估吓櫈仔先。事關美國大選今日正式舉行，無論係奧巴馬定羅姆尼，都冇絕對勝算。
市場耳語謂，上周五商品市場見明顯回軟，似乎投資者都退兵望一望。雖然在兩黨制下，難聽啲講句就算選隻馬騮入白宮，對大局分別都唔大。
但短線而言，投資者最着重的是政策延續性。所以奧巴馬贏，對市場氣氛有幫助，但如果國會係由共和黨揸旗，咁今年底個「財政懸崖」拆唔拆得掂，仍令人有啲擔心。
羅姆尼贏的話，佢放鬆監管和降低稅收嘅取向，有錢人會Buy，但無限QE、寬鬆貨幣會否持續，就有個問號；而且短線佢會開邊瓣，來顯示一吓佢對中國採取較強硬態度的立場，對投資者嚟講亦有點頭痕。
除咗大選之外，原本滙控（005）的Q3業績亦對後市有舉足輕重影響，如果獅王一如預期業績靚仔兼re-rate，港股隨時又突破。只可惜，最後表現平平無奇。仲有中共十八大接力嚟緊，睇嚟又要靜一陣了。
海迪