樂隊Soler嘅細孖Dino自09年同圈外女友黃麗施（Nancy）結婚後，一直積極造人，噚日Dino老婆成功誕下龍B仔，Dino升呢做爸爸，有讀者爆料話佢老婆喺瑪麗醫院剖腹生B，不過因為血壓偏低，所以Dino細心照顧嬌妻。
似足爹哋
Dino同太太都係藝術工作者，所以冇同B仔影相，Dino好貼心咁親手幫乖仔畫咗張素描，仲希望透過幅畫表達對B仔降臨嘅喜悅，Dino透過助手話：「個仔同我一個餅印，亦都好似我出世時咁樣，遲遲唔肯出世，要媽媽用心等待先肯出嚟同我哋say hi。」
此外，上月30日誕龍B嘅孫燕姿，佢嘅唱歌恩師偉崧日前探望愛徒，大讚佢精神不錯，冇變肥，不過爆佢陣痛足足20個鐘先成功生B，偉崧話：「她大呼很痛，寶寶的頭髮濃密。」有不少粉絲為偶像嘅乖仔改名，據知孫燕姿最鍾意就係「納小子」呢個小名。