【跑馬地】已經定咗喺今個月17日同未婚妻拉埋天窗嘅李璨琛，之前講話會專心籌備婚禮，所以只係拍咗TVB套《怒火街頭2》同幫電訊魔童王維基間免費電視之外，都冇接其他工作。不過唔知係咪婚期近，壓力有啲爆煲，話說前日下晝4點幾，戴住副黑超嘅李璨琛同女友手拖手喺跑馬地拍拖，最好笑係李璨琛將抽鎖匙勾係褲袋正正要害上面，一路行一路吊吊fing。
李璨琛攞咗袋衫去洗衣店放低，出到門口見到有記者影相，雖然隔住副黑超，都感受到佢嘅怒火，反而未婚妻即時搭住佢膊頭，㩒住未婚夫嘅火，跟住佢哋去咗間南貨店睇大閘蟹，怒火仲未消嘅李璨森不時回頭望記者，就算去攞番架泊喺街嘅Benz都忍唔住怒睥幾下至上車，何必呢，都就嚟做新郎哥。
採訪、攝影：徐錦池、李志明
