【長沙灣→尖沙嘴→長沙灣】今日33歲生日嘅胡杏兒，7月宣佈同拍拖8年嘅黃宗澤（Bosco）分手，原本杏兒住喺沙田晉名峰，同Bosco係樓上樓下，但分手之後杏兒為免撞口撞面尷尬，所以月前豪擲1,600萬買咗長沙灣郝德傑山兩個相連單位，準備裝修完之後搬入去住。原來杏兒新居已經裝修完畢，近日已經新居入伙，前日記者見佢喺超市買完嘢之後返新居。
戴黑超買嘢
前晚7點，杏兒同疑似佢二家姐胡美兒喺長沙灣碧海藍天一間超市買嘢，記者去到嗰陣，杏兒已經掃完貨畀緊錢，由於杏兒戴晒黑超，所以引嚟唔少市民眼望望。杏兒買咗兩架手推車嘢，收穫相當豐富，之後杏兒去停車場攞車，同家姐去咗尖沙嘴美麗華商場食肆開餐，擦咗成兩粒鐘先至走人。杏兒之後同家姐直接返去新居郝德傑山，正正式式同Bosco斬纜。
杏兒嘅前男友Bosco，噚日就出席新劇《好心作怪》開鏡拜神儀式時，佢否認同徐子珊嘅緋聞，仲同子珊講好話：「佢唔係點姣喎，除咗裝扮似女人外，係一個仔嚟喎。」杏兒今日生日，Bosco就話任何朋友生日佢都會發短訊祝福。
採訪、攝影：李志明、徐錦池