網上瘋傳一個快將嫁人嘅女子，於fb發帖，話將會喺酒店擺酒，如獲邀出席朋友諗住畀人情五嚿，就唔好去飲，「免得做成你又生活艱難，我又不爽」。
以往有人「先借錢後擺酒」，再將收回的人情「債務一筆清」。變相抵押朋友間友情借孖展，好彩嘅就回本，甚至有得賺，不過呢支歌仔早因通脹而成絕唱。
據網友提供資料顯示，家酒店擺一圍入場費1萬蚊，婚宴專門店7000蚊起跳，普通酒樓就最經濟，5000蚊都有交易。即係話，如果去婚宴專門店同酒店，如人人以「酒樓$500、酒店$800」此公價做人情，係絕對回唔到本。
所以告誡上述女子其實蝕你就預咗，又何必為蝕多少少而爛塊面。「港女之心，女皆有之」，但都唔好去到咁盡。人家唔係食少你隻鮑魚會餓死，拎幾百蚊出嚟食一餐唔知會否難食嘅飯，都係戥你開心、畀面你，何必仲嫌棄人情少？
Fifi
本欄逢周二、四刊出