【上環荷李活道】石修個仔陳宇琛（石仔）近排不論事業或者愛情都重新出發，事關喺無綫浮沉多年嘅石仔，9月過檔王維基旗下嘅城電準備大展拳腳；感情生活方面，佢同袁彩雲胞妹袁麗娜分手後，最近識咗位貌似袁彌明嘅長髮新歡。前晚石仔同新歡喺上環荷李活道手拖手行街，認真甜蜜。
齋睇唔買
前晚7點左右，戴住cap帽嘅石仔同女友現身荷李活道，女友揸住個黑色水杯蹺實石仔，兩個人不時「頭岳岳」，原來佢哋搵緊嗰度一帶潮舖。石仔先去間賣鞋同飾物嘅舖頭揀眼鏡，由於心大心細唔知買邊款，結果佢決定乜都唔買慳番荷包。之後佢哋睇潮家品，石仔樣樣嘢都好有興趣咁攞起上手望一眼，跟住就放番低，擺明混吉。逛完家品店，石仔再拖女友睇衫，但同樣又係混吉。雖然行足40分鐘都冇買嘢，但石仔女友依然相當enjoy，仲不時用機影低石仔行街睇嘢嘅相㖭。
採訪、攝影：楊浩賢、徐錦池
