深圳老翻多，估唔到明星一樣有老翻，網友都話28歲、身高186cm嘅男模張傳奇有深圳古天樂稱號，個樣激似古仔，最近佢仲嚟香港參加亞洲先生選舉，噚日26位準亞洲先生同嘉賓Ana R.同Jessica C.喺上環見記者，現場大家都話21號張傳奇真係好似古天樂，睇嚟古仔以後拍戲，可以請佢做替身。
被舊相出賣
張傳奇因為似古仔，所以佢喺內地都有好多人搵佢行騷，睇佢着泳褲露胸肌啲相，皮膚又曬到咁黑，真係有九成似古仔，之不過佢個樣就冇古仔咁靚仔。張傳奇曾經接受訪問，話其實佢唔想做翻版古天樂，只想做番自己，噚日佢接受訪問時話：「高中時有同學覺得我像古仔。」記者即要求佢扮古仔喺車胎廣告講「想節能輪胎能」對白，講完佢自己都忍唔住笑。笑完張傳奇補飛話：「說廣東話也難，他說國語跟我說廣東話一樣。」其實睇番張傳奇早年嘅相，似係整過容，由白白淨進化到變曬黑嘅古仔。
亞視高層葉家寶透露參賽者會喺鬧巿巡遊，並會越着越少，而去年眾人着水晶褲，今年改着發光泳褲。由即日開始接受網上投票，並指節目娛樂豐富，當大禮賀無綫台慶。
撰文：馮仁昭
