毫不興奮：曼聯
英超競爭激烈無人不知，早年走了寸王摩連奴後，絕大部份領隊說話得體凡事留一線；曼阿戰，近年張力越見褪色，原因兩隊整體實力都在下降中，尤其阿仙奴，根本已非曼聯大敵，所以上盤客會為買了半/一盤，全場佔盡優勢，過了補時4分鐘被阿仙奴追番一粒，嘔番半格出嚟而激氣；費格遜賽後也好客氣，先話球隊最重要改善12碼命中率，繼而婉轉話呢場波好奇怪，根本唔似兩紅傳統宿敵戰，最後彈一句，其實應該可以執4、5粒。連王牌射手掉轉槍頭都即刻做到嘢，成場波踢到笑笑口，何有宿敵之意義？佢笑嘅，也可能係半場畀咗件波衫對方、屎到爆嘅安德里山度士；佢笑嘅，亦可能搵基奧特代替我？阿仙奴，一日冇養傷中嘅基蘭基比斯復任左閘，後防場場失！一日重用冇翼4-3-3，前線會續陷入球荒！(不計聯賽盃，近4場入得2球)盲目捧佢哋場者，輸半格，真係要還神！
王者留憾：巴塞隆拿
幾時都堅持，捧場要先講值博率，否則單場賭熱門，輸死未天光；上輪曼聯冷贏車仔2.9倍，當然有啲好彩，但今次鬥阿仙奴得1.6倍，小弟呢場作壁上觀，就算要捧紅魔場都要重策略，贏錢唔係講次數，係講彩金。同事牽牛上周六簡評話我笑佢成日俾巴塞收服，其實我唔係針對呢位經常互相勉勵、相識十多年嘅真戰友，係針對巴塞隆拿。地上最強，都會俾莊家用賠率收服，唔計盃仔，由主場鬥皇馬和2:2，近5場亞洲盤計輸4，即係馬會每每開到巴塞[-2]，要佢哋要成日淨勝3粒一啲都唔易。入球大細反而好啲，好多時開到3.5球近5戰4大1細。純欣賞，睇巴塞真係好爽，人哋中場越搓越前，一下即直插對手心臟；阿仙奴都好搓，但係個波去到前場多數會回後，核突！
一池死水：黑池
近期俾英冠玩死，執筆貼成冷嘅黑池時，領隊荷路威剛落空布力般新帥一職；點知佢上周六賽前突然跳槽水晶宮，黑池即再作客以1:4敗走打比郡。呢類軍情，根本同賠率盤路毫無關係，將軍一去，相信黑池去到明年１月會掀新一輪跳船潮；恩斯仔「回歸」曼聯好正路，未知新帥乜水，黑池暫時都可能當一池死水，怕了。蘋果波神