巴洛迪利5腳射門冇次中龍，搞到曼城喺上周六作客同韋斯咸踢成0:0，痛失兩分，賽後領隊文仙尼勁嬲，喪插巴神唔夠班！見到班前鋒死晒火，有傳文帥要求高層買尼馬返嚟。
其實呢場個天都企喺曼城嗰邊，上半場韋斯咸嘅路蘭妙射食「詐糊」，但睇番慢鏡，路蘭應該冇越位！之後曼城搶番唔少攻勢，但畀巴神浪費晒，5次射門全部唔中框，最後兩隊踢成0:0。真係契仔都冇面畀，文仙尼賽後寸巴神唔係頂級射手，「當好似巴神咁嘅球員，如果有今日咁嘅機會，係應該要入到波先啱。因為如果你係頂級球員的話，有機會破門，你就一定要把握到。」巴神今季9次聯賽上陣，射咗19腳，但只係得4腳中目標，而且仲未開齋。其實，見到女友拉菲娜家大住個肚，巴神都好應該長大吓，專心踢好啲波賺奶粉錢，計劃一下成家立室。
1月擬買尼馬
不過，曼城就冇咩耐性，文仙尼嚟緊會同新任足球總監碧格歷斯坦傾吓1月轉會方針，有傳文帥要求佢盡快買尼馬返嚟。家20歲嘅尼馬好鬼fit，啱啱上場連中三元，幫山度士喺巴甲贏高士路4:0，所以巴塞隆拿都對佢好有興趣。