上個月傳出藝人江希文（原名江欣慈），同拍拖半年嘅《基本法》研究中心主任兼資深大律師胡漢清閃電結婚。噚日胡大狀出席一個關於《基本法》嘅座談會，大講《基本法》嘅權力配置同平衡，胡太江希文都有現身捧老公場。
聽得入神冇行開過
全個座談會歷時三個幾鐘頭，胡大狀打頭陣演講，八方見胡太聽得好入神，講咗成個鐘都冇行開過。不過，呢份專注只有胡大狀獨享，皆因到第二個講者發言時，都未講到入正題，胡太就已經「起錨」，離開會場喇。胡大狀今次已經第三度結婚，前妻包括張天愛、名模余慧敏，後者同佢生咗一仔一女。早前江希文接受訪問時，就甜絲絲大讚老公夠細心，人品又好，佢唔會介意對方有過兩段婚姻喎。