扮鬼扮馬嘅萬聖節啱啱過咗，但大話英似乎未玩夠，佢噚日出席一年一度嘅香港童軍大會操，粉墨登場穿上童軍制服兼帶埋帽，豎起三隻手指宣誓做埋童軍。狼振英着起童軍制服，幹部味十足，似少先隊多過似小狼隊目。唔知加入共產黨時，係咪都要着成咁，舉起三隻手指宣誓嘅呢？狼振英噚日一身童軍裝束出席喺香港大球場童軍活動，實行唔扮嘢，做自己。因為佢噚日嘅打扮，似足被多番惡搞做土共幹部嘅真人版。除咗着制服，狼振英仲豎起三隻手指即場宣誓做童軍，其中一句「為國家，盡責任」，心入面係咪諗緊「為共產黨，盡責任」，為阿爺完成「四大政治任務」呢？
畢業後首次着制服
狼英為咗言行俱似，致辭時就模仿強國領導人發表「三點感受」，話自己自中學畢業40年後，呢次係佢再次着上制服。狼振英今次換晒衫玩童軍cosplay，得香港童軍總會好鬼開心。因為法例寫明，特首係童軍嘅總領袖，但係前兩任特首都視童軍如無物。首任特首董建華即使出席，都冇好似狼振英換埋衫咁認真，好多時仲係派副手出席算數。前任曾蔭權就更加離譜，做咗七年特首，未曾試過出席大會操，所以有童軍喺facebook整咗一個「我相信能召集1萬童軍，要求曾蔭權為多次無故缺席童軍活動而道歉」，有幾百人和應㗎。童軍早前喺月刊將台灣代表制服上嘅青天白日滿地紅旗變蒙，咁識時務，唔怪得疑似地下黨員嘅狼振英着到成個幹部咁款去撐場啦！李八方mailto:[email protected]