【跑馬地】蘇永康近排接受查小欣嘅無綫節目《爆足一周》訪問，澄清同廖碧兒嘅緋聞，點知查小欣喺節目質疑康仔講嘢嘅真確性，結果辣㷫康仔，搞到關係決裂，而查小欣個節目亦因為俾人狂插兼收視插水，搞到無綫上星期播完第四集即刻喊停腰斬。康仔唔肯對查小欣節目腰斬多作評論，但睇嚟佢家嘅心情似乎靚番晒，前晚記者見佢同女友Anita去跑馬地嘅南亭食日本串燒，食完仲齊齊笑晒口咁離開。
前晚10點左右，康仔同Anita着住情侶裝離開南亭，行出門口之後要喺斜路行落馬路邊，康仔就好識做細心拖實女友，佢咁緊張令人懷疑唔知係咪Anita有喜，所以要咁小心翼翼扶住佢呢？
體貼開車門
康仔同Anita之後去隔籬嘅便利店買嘢之後再去附近攞車，上車嗰陣康仔又幫女友開埋車門，真係體貼到暈。康仔同女友感情咁好，之前傳佢同廖碧兒拍王維基劇而撻着單嘢，真係講都冇人信啦！
採訪、攝影：陳辰、徐錦池