政府推出「辣招」後的一周，本來熱鬧的新盤活動即時變得靜局，整個樓市趨向觀望態度。2010年11月，政府推出額外印花稅（SSD），趕絕短炒客，但投資者很快發現磚頭長揸更着數，兩年過後，樓價累升四成，今期再嚟買家印花稅（BSD）截擊投資者，短短數日，樓市反應如何？
記者：陳家雄、葉淑貞
其中一間專做九龍站貴價物業小型代理行的年輕經紀陳仔正在收拾細軟，打算轉移陣地，過檔新界區上班，他悄悄對記者說：「已經三個月冇開單，仲係全間行都冇單開！未有買家稅前已經好靜，家只係加速滅亡。」
僅5%議價空間
中原麥景培坦言，九龍站客源以內地人、公司客為主，有些「刁」本來傾緊，新政一出，「家業主態度軟化，可接受5%議價，買家觀望，少咗人睇樓。」預計要等一個月後市況才有轉變，「若果到時仍然咁靜，業主或會減多一點。好多業主經歷過金融海嘯，都不會恐慌出貨，就算跌市，九龍站都會跌得較遲。」
富人愛西九，「窮人恩物」則以新界西北為主。祥益地產黃振文說，比起兩年前首次推出SSD，今次只是延長及調整稅率，對本地用家影響不大，「以前大家未聽過SSD，好驚、怕跌，好多業主主動打來減價放盤。有了上次經驗，今次業主知道乜事，而且短線炒家已經絕迹，好多都是長線收租，唔似得上次咁擔心。」區內不乏減價盤，很多都是早前因新盤熱潮而扯高叫價，如屯門叠茵庭，715方呎，業主見瓏門效應，原叫價360萬元，「辣招」到即下調叫價至330萬元。
成交暫且冰封
近年被內地客及投資者攻陷的沙田第一城，業主及買家均持觀望態度，部份業主願意酌量減價，美聯黃錦瀚表示，第一城約300個放盤，當中約15%減價放售，減幅由3至5%，主要集中細戶或極低層單位，大部份企穩300萬元以上。
出招僅一周，成交暫且冰封，但淡友不宜開心太早，因為近兩三年間，市場力量總能令政府辣招變無招，業主見慣風浪，鮮有割價出貨，買家要執平貨未到時候。