太太與舊愛的親密照曝光、與女友結婚不成、演唱會於開騷前一個月撻Q，以上三件事分別發生於農夫成員陸永及C君身上。外人覺得他們黑到爆，他們卻覺得冇乜嘢。幸好天無絕人之路，二人在上述的瀨嘢事件上都有所得着，最起碼他們更懂得珍惜。撰文：李珮洳
農夫的舊唱片公司早前以賣票情況不理想、宣傳不足為理由取消了他們的演唱會。唱片公司高層曾叫農夫以身體不適為由宣佈取消演唱會，二人堅持拒絕，陸永說：「家乜嘢年代呀，歌迷知道邊啲真邊啲假，我哋唔覺得講出真相有問題，叫我哋扮病接受唔到，開唔成咪開唔成囉，冇嘢㗎。」當大家以為演唱會難產對農夫是一大打擊時，他們卻不當一回事，C君說：「我唔覺得呢個係打擊，我會話係一個經歷。之前做訪問大家都問我哋係咪好慘，自己覺得唔慘，起碼件事冇影響我哋工作量、收入亦都冇減少。」
C君慶幸冇結婚
農夫透露，演唱會告吹後一個月，有很多贊助商支持他們再開騷，令他們感到雪中送炭，C君說：「上次開唔成我哋親自打畀贊助商道歉，佢哋都冇怪我哋。隔咗一個月好多贊助商打嚟叫我哋再搞，我哋認真諗過演唱會係咪真係咁難做，最後決定搞talk show，咁台同燈光會慳錢好多。」至於與舊唱片公司關係，農夫強調沒不歡而散，舊公司更有份投資他們於本月18日舉行的棟篤笑《一尾講自爆》。
講到今次的騷，農夫希望觀眾不要誤會，內容絕不是踢爆娛圈秘聞，是次的「爆」其實是他們瀨嘢後的一個公開發洩。C君指的瀨嘢當然是與女友結婚不成，分手收場。雖然經歷愛情波折，C君對愛情仍充滿憧憬：「好彩冇結，唔係就變成離婚。」問到分手原因，C君說開騷先爆：「我求婚唔係出於一時衝動，結唔成我反而覺得係福，老套啲講，經過呢件事好明白自己要啲乜。」拍拖七年，分手的傷痛要用一年時間平伏，樂觀的C君說：「好彩酒席未落訂、人情又未收。我展望將來，有好女仔記得介紹畀我。」隨着舊愛離開香港，這段情亦劃上句號。
一個結不成婚，另一個就結婚生B一次過發生，陸永原本計劃30多歲結婚，享受三年二人世界才生B。怎料一次意外，陸永同時間做老公及爸爸，他說：「老婆初時同我講有咗，我唔係好信，咪即時去買驗孕棒，仲買咗四、五支，其中一支驗出冇，我嗰刻偏向信嗰支，最後去醫生度驗冇得唔信。」
陸永盼追多個B
陸永強調沒想過不負責任，故即向女友母親提出婚事，他說：「我父母冇乜嘢，外母都冇乜嘢，只係結婚時間早咗幾年。」女兒陸一穎已八個多月大，提起愛女一臉笑容的陸永打算再追多個B。早前陸永太太Rainah（泳娜）有一輯與舊愛曲赤的親密照流出，陸永即被指想離婚。對於這件瀨嘢事件，陸永再三澄清沒影響夫妻感情：「大家點解覺得我之前冇睇過啲相，啲相之前都有放喺facebook，嬲乜嘢呀？我老婆嘅過去我點會唔知？所以呢單嘢真係冇乜大不了。」
場地提供：海港城
服裝提供：Aape
