送走《最佳男主角》，迎來下周首播的《走過烽火大地》，洪永城矇豬眼加戇直樣的陽光大男孩形象很入屋，不過這個極討師奶和中女歡心的旅遊節目主持卻說心底話：「我絕對認為觀眾需要教育。」
撰文：蔡俊業
攝影：楊錦文、部份相片由受訪者及無綫電視提供
節目劇照
電視機的指引
五年前訪問過洪永城（Tony），事後相約吃飯，途中有位女士走過來說：「我鍾意睇你做節目呀。」記憶中，他說了幾聲多謝，附送招牌靦腆笑容。那時我想，他肯定坐穩有線電視最受歡迎藝人前列，當年甚至聽說過有人安裝有線只為看他的節目。主持節目有何秘技？就是全情投入，由吃牛扒到飲藥，由攀山到洗澡，不求底線全程奉獻，不會虛假作狀的說：「好味呀！好靚呀！」只有率性而為，興奮、蝦碌、感動、尷尬，統統入鏡。入行七年，由有線的《活得很滋味》，到now的《一個地球》、《食勻全中國》到今年的《走過烽火大地》，洪永城已成新一代最具知名度的旅遊節目主持。
先談背景，洪永城生於富有家庭，父親從事保險業，母親做棉花貿易生意，他說：「有錢嗰個係阿媽。」家住羅便臣道，有傭人照顧，出入坐Benz，十歲跟哥哥一起到新西蘭讀書，媽媽在奧克蘭買樓讓兩兄弟自住，輾轉八年，直到2002年高中畢業，他想變：「雖然阿媽承諾可以供我繼續讀書，但我知道屋企經濟開始唔好，就提出不如返香港做嘢，同埋喺嗰邊八年我覺得好胡混，人生再咁落去唔係辦法，應該要多啲挑戰多啲冒險。」回港，跑到港大持續進修學院修讀廣告及市場推廣，畢業後當過私人樓盤會所的活動搞手，「做中間人，為興趣班搵導師，搞吓中秋賞月活動咁囉。」可惜經不起沉悶這關，「好悶，又無乜前景，想做大公司，讀完書點都要見吓大場面嘛。」最後，上天透過電視機給予指引，「當時屋企有裝Cable，賣咗個廣告，」他模仿廣告宣傳聲帶說：「『如果你鍾意周圍去睇呢個世界，捐窿捐罅搵嘢食，就寄信嚟有線電視大樓啦。」』三百多人競爭，最後十位入選，他是唯一男生。
全體工作人員陪背稿
一手發掘洪永城的，是時為有線電視高層的余詠珊，他說：「佢話因為我夠儍，充滿好奇心但又膽小怕事，其實只係做出嚟嘅效果係咁啫，我唔係無膽。」她曾為他的著作《Tony秘密假期》作序：「Tony有一對笑眼，說話的時候有點靦腆，有點尷尬，儍裏儍氣卻又是陽光男孩，很討女性歡心，而同性又嫌棄他懵，覺得他沒有殺傷力，自然不會對他反感，這就是他的觀眾緣……」觀眾緣這三字跟強積金一樣跟隨大市波動，能夠事業更上一層樓，還得靠努力。
初入行，他自評慘不忍睹，「我唔算好健談，但做主持一定要好吹得，形容詞要好豐富，我唔係呢類人。」忘記對白、走錯位、記得對白忘記望鏡頭，望得鏡頭時又忘了望景，兩樣皆有時又沒有表情，一個場景十幾次NG等閒事，令阿姐皺眉，決定出手。在台灣宜蘭拍外景，介紹餐廳要講兩段稿，「佢同我講：『背咗佢，今晚你背一次畀我聽。』」時為夜晚十一二時，他敲房門，打開，誰知全體工作人員包括導演、撰稿、導遊、燈光、收音等齊腳。「佢叫我由門口行到窗台講呢個Tag，背咗廿幾分鐘。」事後，同事秘密告之，阿姐此舉開創先河。「佢哋話喺電視史上，從未聽過有主持要成班工作人員陪佢一齊背稿、行一個Tag。嗰次阿姐無鬧，我唔知道咁嚴重，我以為個個入行都係咁。」
往後起伏和挫敗還是斷斷續續出現，令他自慚形穢，他甚至懷疑過自己根本不適合做主持，令他開竅的是沉甸甸的書，「以前細個唔鍾意讀書，去到有線先知知識唔夠。」轉捩點是看了Stephen R. Covey所寫的《The 7 Habits of Highly Effective People》，「呢本書可以改變到你去Organise yourself、explore yourself，令你更有動力，確實係本Masterpiece，入面講嘅理論，好多人本身都知道，作者重新講一次，譬如：『When you work with some people，think win win。』」然後畀好多例子引申，說明人需要少少Rules去幫助自己運行，以前我成日遲到，半個鐘一個鐘，睇完呢本書之後再無遲到，家我返到屋企，會諗諗聽日要做啲乜，呢本書好有用，之後開始越買越多書睇。」時下旅遊節目，很多主持只是跟稿讀，反應造作，洪永城憶起余詠珊教路：「佢話做主持一定要有自己角度，唔可以跟稿讀，即係你去到每一個地方，都要將感受同導演講，再同佢商量點樣拍攝。」而感覺源於內涵厚薄，言即又是那句老套的──多看書。
中東人好可憐
此書的正面影響至今依舊，他說：「本書教曉我要做好準備工夫，記得有句大意係『If you fell to prepare, prepare to fell。』從此我每去一個地方，事前都做足功課。」如今次拍攝《走過烽火大地》，他和攝製隊先後到過伊拉克、黎巴嫩、伊朗、土耳其、格魯吉亞及位於俄羅斯、車臣共和國和格魯吉亞三國邊境的車臣村，事前花一個月時間準備，包括看張翠容著作《行過烽火大地》和《中東現場》、葉中嫻《窺視中東》、奧斯卡最佳外語片《伊朗式分居》等等。在準備過程裏，他發現香港人對中東有很多誤解，認為中東很邪惡，滿街恐怖分子，「其實只要親自到現場了解，就知道只不過係西方媒體煲出嚟嘅形象。」
洪永城還看過一套有關911的紀錄片，震撼心靈，「唔知真定假，講911事件其實係美國策劃，為乜？為順理成章佔領中東，包括油田。紀錄片做咗好多細微計算，例如點解世貿大樓喺2001年年頭，業主突然加保？點解事發當日世貿大樓班公司高層咁啱全部離開紐約開會？點解五角大樓見唔到飛機殘骸？點解附近啲閉路電視錄影帶全部俾美軍沒收？」
誤解源於無知，設身處地即恍然大悟，「伊朗點解要持有核武？因為夾喺伊拉克同阿富汗中間，兩國都畀美國攻打同佔領咗，艾哈邁迪內賈德作為國家元首，如果唔把持核武，伊朗就會成為下一個俾人佔領嘅地方，但美國以正義之名標籤伊朗破壞世界。」經四十日拍攝工作，除膚色變黑人瘦了點外，還帶來無數感觸，「好可憐中東人，呢個世界對中東人唔公平，大家都係有手有腳平常人，點解中東人要飽受其他民族欺壓？去到邊度都好似係二等公民咁。」感觸之外，還有可惜，「中東其實有好多靚地方，伊朗嘅伊斯法罕以前係波斯帝國首都，皇宮金碧輝煌，馬賽克全部用玻璃造成，喺陽光反射下好Splendid，伊拉克北部風景都好靚，但就係無人去了解。」
帶觀眾看世界
香港電視業落後全球，他又如何看本地製作的旅遊節目？「無論層次同種類，呢五年十年確實無乜改變，香港電視台太自我限制，其實有啲旅遊節目可以大眾化啲，搵個食神講幾句慳Budget，有啲應該Explorative同adventure一啲，譬如可以試吓玩降傘遊台灣，喺邊度降落就喺邊度開始搵食，食完搵另一個山頂再跳。TVB係最大平台，你幾可見到做戰火節目？呢次已經係新嘗試啦。」不怕趕走觀眾嗎？「我絕對認為觀眾需要教育，呢個咪就係電視台自我審查嘅問題囉，電視台有責任帶領普羅大眾睇呢個世界，觀眾先有責任去Live their lives，成個行頭發展嘅最終責任應該喺電視台身上，唔係由觀眾決定。」
場地：沛記圖書文具公司（柴灣漁灣村漁安樓五號室）
註：《走過烽火大地》11月5日起逢周一至五10:30pm翡翠台及高清翡翠台直播