上月47歲生日的郭富城，本來與女友熊黛林於早前秘密往馬爾代夫預支蜜月兼再賀生日，可惜被網友在微博踢爆。兩人昨日前後腳返港，全程嘴角含春的城城大讚傳媒講的攻城、焚城具創意，熊黛林就大呻好攰，但還不敢自封郭太。
早前被指孖住到馬爾代夫預支蜜月的郭富城與熊黛林，昨日前後腳返港。城城於下午二時，與一位推着行李的機場職員步出機場A閘口，全程嘴角含春的城城，向現場20多名記者和粉絲揮手。
喜愛「圍城」
對於被指預支蜜月，城城說：「咁有創意？幾好笑呀！」問城城是否在馬爾代夫度假以及慶祝詳情，城城笑而不答，其後只說：「之後喺香港同北京有好多宣傳。」
問城城在馬爾代夫有否潛水曬黑？他說：「你哋咁有創意，點答呀。你哋好多同事喺上邊分佈晒，好叻，好似私家偵探。」城城亦沒直接回應熊黛林身在何方：「你哋問啲同行咪仲清楚，其實乜嘢都係你哋講，又話攻城、圍城、焚城，好彩我仲企喺度，今次呢個係特別有創意嘅諗法，好得意。」問城城是否已被人攻陷？他只說：「辛苦晒！」
約15分鐘後，熊黛林在同一閘口步出，略見疲態的她表現淡定，似乎早已有人通風報訊，聲稱放假叉電的熊黛林，否認此行預支蜜月。問與城城感情是否大躍進？她甜笑說：「冇乜嘢，多謝關心。」她沒透露送了甚麼禮物給城城，當她聽到攻城成功，又再面露笑容。問有否被馬爾代夫的度蜜月和求婚勝地氣氛感染，熊黛林說：「睇唔到呀，我只係諗住放假，放假係最開心，我叉足電喇，過幾日可以去杭州拍戲。」
唔敢認郭太
問熊黛林會否正式公開戀情？她說：「冇諗咁遠，我坐完飛機好攰，畀我返屋企唞吓。」至於可否改口稱她做郭太，熊黛林即睩大眼說：「冇冇冇，千祈唔好咁，家開心就夠！」熊黛林回家不久，即在微博放上一盒炒麵的相，並說：「有時候，越簡單的東西就越能夠帶來滿足感。」似乎她對此行很滿足。
採訪、攝影：何慧斯
