香港製冰員工被指捲入集體貪污事件，廉署昨天派出大批人員往多家食肆調查，在筲箕灣道泰榮華餐廳，四名廉署人員逗留了一個多小時。據悉，廉署人員主要向餐廳了解購買冰粒的過程、價錢、數量，以及如何與運冰職員接洽和運冰職員的資料等。
「我哋乜都唔知㗎」
至於涉嫌在筲箕灣線食夾棍的冰廠工人阿俊，昨晨如常到東大街及太康街一帶送冰，但至11時許，本來該前往愛東村送冰的他，竟將運冰車泊在太康街，然後與司機逕自走近一部私家車，跟車內人密斟。隨後由另外兩名穿橙色制服的香港製冰職員，接替阿俊的車運冰，而阿俊和司機則乘私家車離去。記者上前查問接替的職員，他們連忙解釋︰「佢哋俾公司召返去傾偈，我哋係替工，乜都唔知架！」據悉，剛轉投香港製冰個多月的阿俊，很可能會成為「祭旗」替死鬼。「佢係香港製冰請返去嘅新人，要死梗係死新人先，唔通高層自己篤自己出嚟咩」。知情者說。而負責九龍城線的阿銘和阿豪，昨日未見蹤影，換上另外兩名員工運冰。記者上前查問，對方耍手擰頭︰「冇呀，冇呀，乜都唔知㗎！」記者事後到香港製冰位於茶果嶺道的食用冰廠房，見氣氛非常緊張，不少穿上制服的同事被急召回公司開會。「佢哋開會係想查邊個向外爆料，然後將籠裏雞炒走，唔係查同事食夾棍嘅問題」。知情者說，若成功找出爆料人，會即時將對方辭退。《蘋果》記者