【銅鑼灣】鄭少秋將會喺今個月30號至下個月3號參與「顧嘉煇大師經典演唱會2012」演出，雖然就嚟開騷，但秋官都有抽時間陪老婆官晶華行街買嘢。好似前日下晝5點左右，記者見佢同官晶華現身銅鑼灣嘅city'super買餸。
秋官戴住帽，而官晶華就薄施脂粉，兩個人淨係揀咗啲肉，跟住就排隊畀錢。佢兩公婆排隊期間有講有笑，有途人認得秋官，於是主動同秋官打招呼，秋官都有點頭同對方打招呼。
邊行邊講電話
冇幾耐，秋官發現記者影相，於是同老婆分頭行事。秋官急急腳走去停車場攞車，仲邊行去停車場邊用耳機講電話。至於官晶華就繼續排隊畀錢，佢行出超市嗰陣見到有記者影相，跟住佢就好似秋官咁用急步跑去停車場。唔知官晶華係咪趕返屋企同秋官煮飯仔撐枱腳呢？採訪、攝影：羅德光
