一班網民呢排狂晒港英旗，辣到老左紮紮跳，前港澳辦主任魯平都加把口，叫「港獨」分子唔鍾意大不了退籍。呢班網民求之不得，決定「玩鋪勁」嘅。噚日向國家領導人同中聯辦發公開信，要求阿爺「言出必行」，喺西環整番個褫奪中國籍專櫃。
倡設褫奪國籍專櫃
facebook專頁「我哋係香港人，唔係中國人」噚日發公開信，抬頭畀溫總、胡主席、中聯辦彭清華、李剛，又經港辦轉交陳佐洱、魯平，叫阿爺「千祈咪走數」，記住喺中聯辦大樓地下大廳或者「第二支管治團隊安排其他合適場地」設立辦公櫃位，專供只認同香港人身份、唔認同中國人身份嘅人士到場宣誓，只要高叫三次「我係香港人，唔係中國人！」，彭清華就可以代表阿爺簽字作實，正式褫奪嗌口號者國籍，到時專頁發起人必奉陪到底。
封信除咗挑機，都不忘講吓道理。查實有人搞港獨只係「偽議題」，佢哋只係借港英旗引發港人緬懷97前嘅「好日子」，當時仲有法治、有規有矩，唔似得阿爺搞到香港一鑊粥，家吓成班老左唔單止冇反思，仲要文革式批鬥，既無奈又討厭。