今輪主力埋首以近期球隊部署拆局，結合值博率出手，會放輕往績。本欄近勢似弱，選材先要旺隊，重心捧紐記同車仔！今周重心本選明晚護級大戰昆士柏流浪殺低周中耗力甚巨嘅雷丁，快過對手開齋搶W。曉士唔等得，呢位前曼聯射手喺外圍莊家列為下一位被炒領隊嘅大熱，但奇怪昆軍只係降班第6熱，足證有專家覺得呢隊波班底唔差，炒咗曉士都有得救；衰在主隊中堅麥比亞停賽，焗用番安頓費迪南，加上賠率偏熱，小弟唔敢上貼士表；雷丁周中一場無厘頭聯賽盃，焗住同阿仙奴激戰120分鐘，最終輸5:7，好傷！英冠唞了一陣又要應付未來一輪快車，下周中本欄會重點分析，今周獨選黑池作客到中游冇乜作為嘅打比郡開半冷W。隨住布力般宣佈貝治做新領隊，大家可放心荷路威會續領黑池重踏正軌（雖然水晶宮向佢招手），以班波質素冇理由排喺10名過外，連敗後又連和，今場要冒進啲直取客W。英超重心先取車仔今晚「夫添」殺「天鵝」史雲斯，前者周中半力戰盃仔，有運殺番曼聯一鋪；雖後顧下周三主場鬥薩克達，但後者其實3個回合過後已帶出，車仔今晚可全力撲擊史雲斯收復聯賽輸曼聯之失；對手周中竟然喺盃仔「夫添」作客殺低紅軍，如果米高勞特立賽前早響話要爭，相信唔使咁多紅軍迷中伏，又唔使對方領隊羅渣士落後下，慌忙調入謝四同阿蘇上陣，但終功敗垂成。紅軍嘅部署我難明，抵同事守丹獨具慧眼，賽前重心重注選中史雲斯[+1]反勝小弟，10月擂台封王。史雲斯續由隊長艾殊利威廉斯領導防線兼出後備龍門，撼低紅軍已耗巨大體力，相隔3天迎近兩場聯賽作客殺敗同市球會阿仙奴及熱刺嘅車仔，門前勢必風聲鶴淚，馬會唔敢開半/一讓球盤，可兼多注車仔勝[-1]。另一W選明日紐卡素，近年作客對紅軍賽績輸蝕；但周中冇波蓄銳，而且毋須對已有優勢嘅下周歐霸盃分組賽太着緊，紅軍部署毫無章法，進攻無論任何賽事要靠阿蘇硬闖；相反紐記幾位黑人前鋒任用，後防亦有高洛仙尼頂住同樣嚟自南美嘅阿蘇，希望紐記經上仗主場幸運勝出後，作客病除，開個大冷W。(下次見報日期：06/11)蘋果波神
今周精選
《正》車路士勝《副》車路士勝[-1]《冷》紐卡素勝、黑池勝