立法會保皇派噚日喺內會，聯手否決成立專責委員會調查中聯辦令DBC「封咪」一事後，立法會會議廳突然出現異象，全體議員除咗工黨張國柱外，發言時都被「封咪」，最後要由立法會職員出動無線咪畀議員發言時用。
立法會其後表決由工黨張超雄提出，要求成立退休保障小組委員會動議時，個天唔知係咪睇班投反對同棄權票的建制派唔順眼；唔單止令召喚議員投票嘅鐘聲一度「被滅聲」，整個投票系統更加全線失靈，搞到議員投票時全部要舉手，再由秘書好似小學生返學點名咁讀名作實，令市民前所未有咁睇清楚佢哋投票嘅立場。話時話，新立法會啲器材，原來咁鬼豆腐渣。