唔少學生都驚讀錯科，但身為「公職王」嘅行政會議成員陳智思（Bernard，圖）話，讀咩科冇問題，至緊要夠另類。Bernard噚日喺一個論壇上，同年輕人分享佢當年讀大學時因大病纏身，為求盡快畢業回港，唔鍾意畫畫都走去讀藝術，最後仲錯有錯着，用塗改液點喺張黑紙做「點畫」，出位之餘呃咗唔少like。
Bernard話呢個藝術學位凸顯佢與眾不同，98年佢做立法會議員，主席范徐麗泰就話因為佢係藝術系畢業，所以叫佢負責統籌立法會標誌嘅設計，擺平政見紛紜嘅立法會。佢又話，當年佢係保險界議員，查實佢唔識保險，只係因為佢喺保險公司嘅投資部工作。