既然個人同下半世幸福都畀咗你，閒時睇吓ex張相啫，使唔使日日打翻醋埕，指住人個鼻嚟鬧先？以為老一輩呀Left ear、「腦平」唔明啫，點知原來話好打得嘅政務司司長林鄭都咁睇唔開。事緣有政府部門唔知有心定無意，用咗殖民地時代嘅「On Her Majesty's Service」（為女皇陛下服務）嘅政府信封寄信畀巿民，林鄭知道後當場紮紮跳，變咗憤怒鳥，發信警告公僕唔好再有下次。
「憤怒電郵」轟公僕
有公務員噚日收到來自政務司司長辦公室嘅「憤怒電郵」，內容係咁嘅：「我們注意到，近日有一名市民收到一封用『On Her Majesty's Service』的信封寄來的政府公函。雖然這次屬個別事件，但我們希望藉此機會提醒所有局和部門，要盡力避免類似事件再次發生。請留意所有與港英時期的用字、標誌、符號已經過時，官方不應再用。」
公務員睇完封信個個即時睇吓個out tray有冇咩「龍獅」、「事頭婆」嘅嘜頭信件，以免人頭落地。查實以往運輸署都試過被揭發寄咗「事頭婆信封」畀巿民，話就話有存貨用得唔好嘥，但事實係咪有人鍾意效忠女皇，多過服侍強國爺爺，就冇人知喇！
計八方話，所謂寧俾人知莫俾人見，有異心都要高明啲，前度嘅嘢，在心中就得啦。
講到新民黨田北辰前日建議，立法會應用番英文開會，咁中聯辦又使唔使發信警告吓佢？
mailto:[email protected]