失婚黎明對住班記者笑笑口,仲有心情講金句,皆因佢見慣大場面,離婚對佢嚟講濕濕碎啦。99年,黎明被誤傳為舒淇而自殺,第日即刻上晒報紙頭條,全球fans發短訊慰問,又有成隊記者嚟採訪,不知幾轟動。
話說當年黎明同舒淇拍《玻璃之城》撻着,但班fans唔鍾意舒淇,搞到黎明超冇癮。99年3月10日凌晨,有指黎明被家人發現佢喺屋企昏迷,即時送去養和,腦部出現輕微缺氧,盛傳佢仰藥。嗰晚黎明出嚟見記者,雖然個樣超攰,但依然發揮金句王本色,佢話:「唔知邊個傳呢個消息,傳得咁唔清楚,令大家白行一趟。我只係一個歌手,唔係偵探,唔通聽日有人話我去鵝頸橋耍雜技,我又要出嚟澄清?」第二日,黎明再開記招交代:「唔知點解俾人咒死。我係唔會自殺,我對生命充滿熱誠,呢啲頭條唔上都罷。」但佢由始至終都唔肯承認同舒淇嘅戀人關係。
而近日黎明同樂基兒離婚,舊愛舒淇就不斷喺微博發功,開解黎明仲同佢打氣,真係有情有義咯。
撰文:阿Wow