盧海鵬自79年在《歡樂今宵》首扮盲俠勝新太郎技驚四座後，展開了30多年扮嘢生涯。歷年來鵬哥扮過不少爆笑經典人物，就連近年扮嘢出位的福祿壽也要企埋一邊。今日就跟大家重溫鵬哥扮嘢之最。
羅人《幾許瘋語》
（羅文《幾許風雨》）
鵬哥抄足羅文造型神韻唱 《幾許瘋語》，又捧住飯盒唱出抵死歌詞「食飯擰轉面」。由於鵬哥扮到幾可亂真，搞到羅文當年戲言要發律師信告鵬哥。
張惡榮《Stand噏》
（張國榮《Stand Up》）
雖然跟哥哥張國榮外形和唱功都差一大截，但鵬哥學足哥哥舞步，又用腰封束腰，成功帶來爆笑效果。
撻成一塊《壽頭記》
（達明一派《石頭記》）
跟廖偉雄組成撻成一塊的鵬哥，全程學足黃耀明貪靚撥頭髮，歌詞中「吹啲打」和「兜兜粉果」夠晒押韻抵死。
大食羅賓《這是菜》
（泰迪羅賓《這是愛》）
鵬哥扮寒背坐在高凳上自彈自唱，笑到當晚王晶等評判標眼淚，鵬哥還扮吊腳踩唔到凳挖苦，換轉今時今日肯定被人去信平機會投訴歧視。
盧氣廷《陪着你嘔》
（盧冠廷《陪着你走》）
本來盧冠廷拖狗唱歌，鵬哥就改拖豬仔唱《陪着你嘔》，當日豬仔驚青四圍亂走，若換轉今時今日，無綫想唔接虐畜投訴都幾難。
鄭欣宜
在無綫20周年台慶上，鵬哥忽然以肥姐沈殿霞愛女欣宜扮相造型出現，結果笑到肥姐當場失禁，一度成為鵬哥扮嘢的經典話題。
葉德殘《我笑》
（葉德嫻《我要》）
鵬哥扮女人功夫亦十分耍家，當年他學足葉德嫻唱《我笑》，歌詞改成「怎麼只偷節瓜，而不偷我的波菜」相當搞笑。
周秀娜
鵬哥食住模熱潮，在亞視節目《香港亂噏》扮周秀娜當街剝衫廣告，鵬哥還剝剩比堅尼泳衣，露出激凸肚腩。
木村拓哉
木村拓哉的GATSBY廣告，在鵬哥演繹下變得爆笑無比，尤其鵬哥着住see through恤衫狂噴腋下時的O嘴表情最為抵死。
