雖然因為颶風桑迪吹襲，令網隊對紐約人嘅紐約打吡戰改期，周四NBA變相只得一場獨腳戲，不過絕非悶場，馬刺憑柏加最後階段連入5分，包括一記超遠嘅兩分絕殺球，以86:84險勝雷霆，報番上季西岸決賽落敗之仇。
聽日鬥爵士爭３連勝
呢場大戰其實係上季常規賽西岸1、2哥交手，亦係西岸決賽翻版，戲碼絕對唔弱；上季以50勝成為西岸冠軍嘅馬刺，今仗雖然仍然有真路比利背傷缺陣，三巨頭得番鄧肯同柏加，面對年輕力壯嘅雷霆，都一啲唔輸蝕。36歲嘅鄧肯上半場最後32秒喺雷霆大前鋒伊巴卡面前，嚟個「in your face」單手入樽，咩彩都攞晒。不過雷霆貴為上季常規賽西岸2哥，季後賽仲殺入總決賽，就算夏登剛剛離隊，增加番3分射手奇雲馬田，連埋杜蘭特、韋斯卜克，攻擊力一啲都冇少過。奇雲馬田連取5分，仲有美羅完第3節前喺後半場射入3分球，追成66平手。第4節雷霆仍有優勢，最後1分25秒韋斯卜克射入兩個罰球，雷霆領先84:81。馬刺嘅柏加成為救世主，先喺最後28秒射入3球分追和；之後馬刺小將尼納特偷波成功，造就馬刺攞番控球權，更即時嗌暫停。馬刺暫停之後，柏加藉兩個單擋擺脫對手追纏，完場前投入壓哨嘅兩分球，領馬刺以86:84險勝，開季兩戰全勝。全場貢獻14分及11次助攻嘅柏加，回味奠勝入球好謙虛咁話：「我一如以往要快投，因為伊巴卡撲出來很快。」馬刺周六將會主場迎爵士，睇吓可唔可以3連勝（now 678台明日8:30am直播）。
紐約打吡改26日上演
另外，因為風災而延期嘅紐約打吡戰，聯盟已經決定於11月26日（星期一）舉行，另外聯盟同球員工會亦答應合力捐出100萬美元，畀紅十字會及其他組織，協助風災災民，而未來各隊亦會喺比賽期間進行籌款活動。
柏加絕殺解構
簡評：馬刺成功絕殺對手，充分顯示球隊的默契（圖）。上半場表現平平的9號柏加，在底線利用2號尼納特和21號鄧肯的單擋，走到3分線外接過4號丹尼爾格連的傳球，再推橫一步，在雷霆大前鋒（９）伊巴卡趕到前射入。當時負責防守的（0）韋斯卜克仍在發夢，距離柏加逾10呎遠，是雷霆輸波的最大罪人。難怪他賽後也認衰，指走甩柏加是他的責任。
NBA周四賽後報告
馬刺 86:84 雷霆註：前者主場資料來源：NBA.com