玩得音響都知，器材分得越細緻越好，但要知香港地每呎地價成千上萬，一機多功能也是不少人嘅心頭好。老牌Marantz近期就出咗部藍光碟機，備有一般機少有的Balanced Output，加上支援音響友極愛的SACD，睇戲聽歌，靚聲一Take過。
記者：韓繼聰 攝影：林栢鈞 模特兒：Ava@Pure Models
Balanced Output藍光機
Marantz呢個音響老牌唔少發燒友都一定識，出嘅音響當然有番啲水準。呢部UD7007睇外形其實同一般Blu-ray機分別不大，一貫Marantz設計風格，不過佢嘅特別之處原來係背面。佢設有一對普通Blu-ray機少有的Balanced Output，對要求高品質輸出的發燒友絕對係必備，加上內建Marantz HDAM模組，有效提升音樂播放的效果，令聲音內容更豐富，更具層次感。UD7007更特設Pure Direct模式，確保以最佳性能設置播放CD或SACD，聽音樂真係同一般Blu-ray播歌有分別！機體設計上，以額外加厚底板增加重量來消除震動，亦將電子組件分成五個獨立部份，減少互相干擾，都屬Hi-end級設計。八千多元買部老牌Hi-end Blu-ray，聽歌睇戲一機過，抵玩！
7.2聲道萬能前級
除了一部歌影俱佳Blu-ray機，Marantz同期亦推出一部7.2聲道萬能前級AV7701，支援3D同4K，加上每條信號都經過Marantz HDAM先再輸出，確保每聲道的質量，用來睇戲邊有得輸！音樂方面，更支援所有網絡設備，包括Android、Airplay、PC、Internet Radio等串流媒體，而所有音頻信號都有其獨特路徑，保證所有信號完全獨立，不同頻道沒有機會互相干擾。除支援所有最新的聲音格式外，佢更設有唔少新機都已經無咗嘅MM唱頭輸入，新舊音樂完全聽晒，又乜都支援咁滯，仲唔係萬能？
後級推介
AV7701是一部前級，可配合唔同後級使用，配番Marantz後級當然係唔錯嘅選擇。
Marantz小資料
Marantz其實早在1953年成立，絕對是音響老牌，雖然現在於日本落地生根，但其實它生於美國紐約。除了一直專注於擴音機製作，當年Marantz更是CD制式的開荒牛，1983年已推出旗下第一部CD機，加上後期品牌的多線發展，無論音響定影音AV產品都保持高水準，且在Hi-end品牌中，價錢唔算貴，所以一直都頗受發燒友歡迎。
查詢：金富視聽科技（2388 9627）