行政會議成員林奮強賣樓賣到一身蟻，噚日立法會開會傾兩招印花稅，袋巾梁家傑梗係唔會放過呢個機會，追問兩個局長陳家強（圖）同張炳良，林奮強有冇收到內幕消息。梁家傑指印花稅影響咁多人，究竟事前有冇人知道？
張炳良先幫林奮強消毒，再三重申辣招只係得幾個局長同常秘知道，行會非官守成員絕對冇消息。
袋巾再追問，呢兩招醞釀過程幾時開始，儍強突然黑面兼發火，「對唔住！我哋唔可以將呢個情況同議員講，唔可以向議員講呢個問題！」袋巾認為官員要答，殊不知儍強嚟料，斬釘截鐵話：「我哋係唔會答！」儍強喺上屆政府一直好鵪鶉，今屆修成正果，終於發威。