米芝蓮星級食肆「添好運點心專門店」旺角間舖，業主要求大幅加租，老闆惟有搬，最近終於租咗奧海城二期兩個地舖，諗住打通變2300呎大舖，其中一個舖家由中原地產租緊，地產代理都要讓路了。
添好運老闆兼主廚麥桂培租到呢個商場舖，開心到不得了。佢話，奧海城商場業主信和置業（083）租務部三個星期前主動聯絡佢，話有兩個相連靚舖出租，佢睇完即刻扑槌。
新竇月租18萬
兩個舖位加埋月租18萬（呎租78蚊），另按租客生意額，再計分成租金。相對旺角間舖只得850呎，新業主要加租1.6倍至11萬（呎租129蚊），培哥高呼新舖租金相當優惠。
條數係咁計嘅，旺角間細舖只有29個位，要做多幾轉生意先夠維皮，奧海城呢間大舖至少放到100個位，加上商場周六、周日人流旺，培哥粗略估計，即使點心跟番旺角個價，平均每碟16至17蚊，呢個舖一個月唔難做到180萬生意，所以佢都想唔加價。
200萬豪裝 1月開張
不過業主對於添好運呢位租客都有啲要求，建議佢落啲本裝修，最好有「陸羽茶室」feel嘅懷舊味道，仲介紹埋設計師㖭。培哥亦預咗攞200萬出來豪裝，事關租約一簽就五年，攤開計數，都制得過。
家其中一間相連舖已經吉咗，旁邊間中原地產收到一個月通知，下月中交舖。培哥收到舖後隨即裝修，預期明年1月中開張，旺角添好運就會做到1月底，實行無縫交接！
李華華
mailto:[email protected]
